నెలకు రూ.2.2 లక్షల ఆదాయం.. ఐనా సేవింగ్స్ లేవు! ముంబై జంట ఆవేదన

నెలకు రూ. 2.2 లక్షల వేతనం పొందుతున్నప్పటికీ, నెల నెలా ఆర్థిక ఇబ్బందులను ఎదుర్కొంటున్నామంటూ ముంబైకి చెందిన ఓ దంపతులు 'రెడిట్' వేదికగా చేసిన పోస్ట్ ప్రస్తుతం నెట్టింట చర్చనీయాంశమైంది. భారీ ఆదాయం ఉన్నప్పటికీ తగినంత పొదుపు చేయలేకపోతున్నామని ఆవేదన వ్యక్తం చేస్తూ, తమ ఖర్చుల వివరాలను వెల్లడించి వారు నెటిజన్ల సలహాలను కోరారు.

'పర్సనల్ ఫైనాన్స్ ఇండియా' అనే రెడిట్ గ్రూప్‌లో ఈ జంట తమ ఆర్థిక స్థితిగతులను వివరించింది. ప్రస్తుతం ముంబైలోని ఒక 1-బీహెచ్‌కే ఫ్లాట్‌లో నివసిస్తున్న వీరు, తమ నెలవారీ ఖర్చుల పట్టికను ఇలా పేర్కొన్నారు. ఇంటి అద్దెకే రూ. 44,000, నిత్యావసరాలకు రూ. 20,000, ఇంటి పనివారికి రూ. 8,000, యుటిలిటీ బిల్లులకు రూ. 4,000 వెచ్చిస్తున్నారు. అలాగే ఆఫీసు ప్రయాణాలకు రూ. 12,000, ఆఫీసు సంబంధిత ఇతర కార్యక్రమాలకు మరో రూ. 13,000 వరకు ఖర్చవుతున్నట్లు తెలిపారు. అదే సమయంలో ప్రతి నెలా రూ.60 వేలు సిప్ విధానంలో పెట్టుబడి పెడుతున్నారు.

అయితే, దాదాపు రూ. 54,000 నుంచి రూ. 58,000 వరకు ఎలా ఖర్చవుతున్నాయో తమకే అర్థం కావడం లేదని వారు ఆవేదన వ్యక్తం చేశారు. ఆకస్మికంగా చేసే కొనుగోళ్లు, ఖరీదైన వస్త్రాలు, పెర్ఫ్యూమ్‌లతో పాటు చివరి నిమిషంలో స్వగ్రామానికి వెళ్లేందుకు చేసే ఖరీదైన ప్రయాణాలకే ఈ మొత్తం వ్యయమవుతోందని వారు పేర్కొన్నారు.

ఈ పోస్ట్ వైరల్ కావడంతో మెట్రో నగరాల్లో నెలకొన్న అధిక జీవన వ్యయం, 'లైఫ్‌స్టైల్ క్రీప్' (ఆదాయం పెరిగే కొద్దీ ఖర్చులు పెరగడం) వంటి అంశాలపై నెటిజన్లు పెద్ద ఎత్తున చర్చిస్తున్నారు. అయితే, సదరు దంపతులు ప్రతి నెలా రూ. 60,000 చొప్పున సిప్‌లలో మదుపు చేయడాన్ని పలువురు ప్రశంసించారు. ఇదొక మంచి పొదుపు అలవాటని, అనవసర ఖర్చులను గుర్తిస్తే పరిస్థితి మరింత మెరుగుపడుతుందని సూచించారు. ఖర్చులపై నియంత్రణ పాటించడంతో పాటు ప్రయాణాల కోసం ప్రత్యేకంగా ఒక నిధిని ఏర్పాటు చేసుకోవడం వంటి జాగ్రత్తలు తీసుకుంటే ఆర్థికంగా స్థిరపడవచ్చని పలువురు సలహా ఇచ్చారు.